للشاعرة…… ولاء حجازى
الحياة أصلا يا سادة مش أكيد سكر زيادة ضحكة رايحة ودمعة جاية والهموم ف الخلق عادة الحياة ترتيب إلهى تلتقيه جوة العبادة لو بتحلم بالسعادة اشتكى الأحزان ف سجدة وارعى فرضك م النهاردة واوعى تبكى ع اللي فاتك اللي فاتك أصله فاتك واللي جاى هو اللي حي والأمل بكرة اللي جى وإن صادفت الليل مقابلك إملا كفك منه ضي واشترى فدان براح وازرعه حب وسماح واطوى ليل الكره طي واوعى تحلم تبقي عالي اللي حبك لسة تحت خد بإيده للعلالي يبقي جنبك مهما رحت وابتدى العنوان بماشي واوعى تغلط وانت ماشي يعنى ايه حزنك ملازمك مهما عاندك قوله ماشي دى الحياة بالحب هايلة أصلها ف الأصل زايلة يبقي ايه آخر المحايلة الشراع دايما ف إيدك وإنت ايدك لسة طايلة الحياة أصلا ثوانى واحنا مش هنعيشها تانى واللي كان منك ميراثك طين وراجع أصله تانى قول لنفسك لما تنسي الحياة أصلا ثوانى
